Dempuèi 3 ans l'escòla participa als tandems solidaris .

Los tandems solidaris son de projèctes amb d'associacions qu'an un ligam amb la solidaritat internacionala.

Las intervencions pòdon èsser completament benevòlas e a gratís ( foguèt lo cas la primièra annada amb los arquitectes sens frontièras ) o professionalas e pagantas mas Occitània cooperacion participa financièrament a nautor de 500 € a n'aqueles projèctes.

Dins l'encastre d'aqueles projèctes foguèt trabalhat: 

- L'arquitectura ( maqueta de l'escòla) e la representacion de l'escòla dins lo barri ( plans ) en comparason amb una escòla en India. ( associacion Architectes sans frontière).

- Las danças tradicionalas occitanas e las dança africanas ( Afro trap)  amb escambis de dessenhs e de videòs amb una mena de MJC al Burkina Faso ( associacion Watineema )

-  Lo projècte d'aqueste annada es en cors de construccion amb l'associacion E-graine e l'Argentina.

Vaquí lo ligam del siti per prene contacte :    Aquí lo ligam

Qu'es aquò l'escaleta? 

L'escaleta es un pairinatge entre los mai bèls de l'escòla e los mai pichons. L'escaleton es lo pichon , l'escaletaire es lo grand qu'ajuda lo pichon

Evidentament se pòt trapar  diferents biaisses de far l'escaleta en fonccion de la configuracion de l'escòla, de la motivacion de las personas e de las possibilitats de cadun. Dins aquel article,  vau parlar unicament de la meuna experiénça de l'escaleta quand aviái la classa de pichona seccion.

Debanament de l'escaleta:

Escaletons e esletaires se rescontravan al mens un còp per setmana dins la classa dels pichons per far de talhièrs, sovent en arts plastics.  Aquela matèria,  permetiá de trabalhar amassa sus de realizacions ont cadun podiá trapar sa plaça, permetiá tanben d'integrar aquela ora dins l'emplèc del temps dels grands  e finalement de tocar a de matèrias, de tecnicas o de materials que plan sovent se trabalhan malurosament pas pus al cicle 3.

Telecargar « debanament de l'escaleta.pdf »

Començar l'escaleta:

L'escaleta se començava pas jamai pendent la primièra temporada, sovent caliá esperar las vacanças de totsants. Los pichons qu'arribavan avián besonh de trapar d'amiras dins l'escòla e d'èsser un pauc securisats abans de poder acceptar sens plorar, de vèser arribar dins la classa aqueles grandàsses que sovent los impressionavan. Pasmens pendent la primièra passa los grands que sabián que se fariá escaleta començavan de prene contact amb los pichons suls temps de recreacion.

Era doncas abans las vacanças de tostsans que se damandava als cicles 3, se volián far escaleta ... Se n'i aviá tant de grands que volián coma de pichons...alara pas cap de problèmas mas se n'i aviá mai la prioritat se fasiá totjorn cap als mai grands :  cm2 puèi cm1 puèi demèst los CM1 prioritat als mai grands en comportament ( cintas de comportament de la classa ).

Pas totjorn aisit d'èsser escaletaire:

L'escaleta deviá demorar una causida pels grands, foguèt pas jamai question d'impausar los talhièrs escaleta a los que volián pas. Aquel principi semblèt fòrça important per la capitada d'aquel projècte. Mas tre que causissiá de far l'escaleta, l'escaletaire deviá perseguir los talhièrs pendent al mens un trimèstre , deviá pas abandonar a la primièra dificultat!

Per l'escaletaire èra pas tojorn aisit d'ajudar los pichons... d'unes escaletons se plorava , romegavan, volián pas far...Lo consèlh permetèt de vèser las dificultats e d'ajudar los pichons mas subretot los grands. Caquelà lo consèlh se fasiá pas tròp sovent ( 1 còp per mes ) :manjava de temps suls talhièrs e los pichons n'avián lèu lo sadol! Aconselhavi als  grands de parlar de las gròssas dificultats als adultes, sens  esperar lo consèlh. Sovent preniái un pauc de temps sus la recreacion que seguissiá l'escaleta, per parlar individualament amb los grands de lors dificultats .  Abans de començar l'escaleta fasiái un consèlh sonque amb los futurs escaletaires, per legir lo debanament de l'escaleta,  e signar los engatjaments.

Telecargar « engatjament de l'escaletaire.pdf »

Las cintas de l'escaleta:

Aviái tanben botat en plaça de cintas de comportament de l'escaletaire :

Telecargar « cintas de l'escaleta.pdf »